بسم الله الرحمن الرحيم .....
شخباركم شمسوين إن شاء الله تمام المهم اليوم في فكره طرت على بالي ,حابه اني اكتب لكم موقف صادني و انا ياهل يعني نغير المود شوي و نخلي الصفحات تكلم عن ذكرياتنا و طفولتنا ما علينا عاد الحين تبون الموقف ها طيب يالله ببدأ 1 2 3 حلفي بس قاعدين بسباق حنا لا لا ببدا .........
قبل لمى كنت صغيره طبعا للحين ما دشيت المدرسه كنت كله ويا اخوي وين ما راح لا و لا يطوفكم ما عندي رفيجات بنات كله صبيان هذا قبل طبعا الحين عقلنا ,المهم هالموقف ما انساه لو شيصير لان موقف يموت و يفقع من الضحك جني طولت عليكم المهم الله يسلمكم مره سمعنا من واحد من ربع اخوي ان اليوم الشيخ بيطلع جني من واحد بعد صلاة العشا و الخبر انتشر بالفريج و الكل درى طبعا انا و اخوي و ربعه ما جذبنا خبر اتفقنا ان نروح للمسجد بعد الصلاة نشوف شيصير و طبعا حددنا المكان و المكان كان ورا الشجره العوده الي يم المسجد المهم نطرنا لمى الرجاجيل يخلصون صلاه و يروحون لبيوتهم و الله و هذا الي صار المهم الشيخ طول على ما كان يقرأ قرأن المهم و لمى حنا فقدنا الامل و قلنا بنروح البيت جان يجون رجالين للمسجد و طبعا حنا عارفين من هم واحد الي فيه الجني و الثاني مرافق له خخخخخخ المهم و الله دشوا و سلموا على الشيخ و قعدوا شوي بعدين قام الشيخ يشوف شغله و قعد يقرأ على الرجال يقرأ و يقرأ و حنا نراقب عن كثب طبعا كل واحد او اثنين لاصقين يم دريشه كنا على ما اذكر سبعه و انا الثامنه المهم حنا من زود الطفوله و البراءه او من زود الغباء والله مدري نطق على الدرايش اطلع يا الجني بنشوفك عبالنا اذا طلع بنشوفه يعني صج يهال ,الشيخ عبدالحافظ للحين اذكر اسمه الله يذكره بالخير كان عصبي و ما يحب اليهال يلعبون في السكيك <<< شدخل الحين نرجع لسالفتنا المهم اول مره الشيخ طنشنا ثاني مره هم نفس الشي الثالثه قال شكلهم مطولين جان يهد الرجال و يطلع علينا و يقعد يصيد فينا و الي انصاد راحت على امه لا و ازيدكم من الشعر بيت الرجال الي فيه جني طلع يصيدنا ويا الشيخ و المرافق ماله طبعا انا و اخوي و لله الحمد شلنا عليه و شردنا و طبعا في ناس شردوا يبون عمارهم و في ناس حرام انصادوو طبعا تهيت لهم ضربه ........
و انا من الخرعه قعدت اصيح في الطريج اقول حق اخوي ليش توديني وياك و هو يقولي انتي جيتي و انا اكفخ فيه و هو يكفخ فيني بس رجعنا سالمين غانمين للبيت <<< اي غانمين خليها على الله .........
لا و الطامه الكبرى ان الشيخ عبدالحافظ ما اكتفى بضربهم علم ابهاتهم عليهم في صلاة الفجر وعليا عليهم بعد انطقوا مره ثانيه و انا واخوي ورفيجه الحمدالله طلعنا من السالفه سالمين بدون اصابات تذكر , بس صج هالموقف ما راح انساه و لمى نقعد انا و اخوي نتذكر نموت من الضحك ..........
و بس الله يسلمكم هذا هو الموقف و بليز ابي تعليقاتكم مابي بس مشاهدات اب ردود الله لا يهينكم و اذا اي حد فيكم عنده موقف تكفون لا تبخلون علينا خلنا نعرف عن مواقف بعض و نغير اجواء المنتديات المعتاده ...........
و يالله ابي الحين همتكم و لا تفشلوني ترى تعبت و انا اكتب الاحداث <<<< اهئ اهئ اهئ
لالا عشانكم كل شي يهون و تستاهلووووون .....
تحياتي (الظبي)........
التسجيل السريع مُتاح 
الإهداءات
03-29-2008
موقف من طفولتي لا يطوفكم ...... 
رد : موقف من طفولتي لا يطوفكم ...... 
انا يوم كنت اصغير كنت يومين اضرب ولد جيرانه يوم شدينه من البيت صار ولد جيرانه الجديد هو الي يضربني
العرض العادي
